敘上海老底子事憶上海老底子人
上海城隍廟
憑什麼吸引海內外香客遊客
（上）
來源：上海故事週末茶座
作者：柯兆銀
改寫：朱楓
講述：馮蓉
文字、語音審核：丁迪蒙
編輯：王乙其
老上海有句流行語：「勿去城隍廟，等於沒到過大上海。」
確實，上海城隍廟勒上海擁有舉足輕重個地位。好，我伲今朝就到城隍廟去看看。城隍廟是上海重要個道教宮觀，伊個特色搭仔曲折個歷史，總歸讓人津津樂道。
所謂城隍廟，就是用來祭祀城隍神個廟宇。古代人為了安全，勒居住個城區修建高大個城牆、城樓、城門搭護城河。城隍廟個「城」指城牆，「隍」則指護城河，道教理論講，城隍是自然神之一，是可以「剪除凶惡、保國護邦」，並負責管理陰間亡魂個神。當上城隍神個，大多數是有功於地方個名臣英雄。
通常，一個地方只好有一隻城隍神，但是上海呢，卻是有得「一廟三城隍」，搿是為什麼呢？
上海沿海，常莊受到海潮襲擊，人們祈求神靈保佑，請出英勇善戰個西漢大將軍霍光來當保護神。五代十國辰光，人們勒沿海個金山衛，就是現在個上海市金山區，修建了霍光神祠。伊歇辰光，上海是隻鎮，還勿是縣，嘸沒資格稱城隍廟，只好稱神祠個。
元朝至正二十九年（1292年），上海正式建縣，人們勒縣城個東北角造了城隍廟，並拿霍光個神像移到廟裡去，奉為城隍神，霍光就成為了上海第一個城隍神。
還有種講法，早年城隍廟個廟址勒現在個永嘉路浪，名叫淡井廟。明朝嘉靖年間上海開始修築城牆，拿廟址遷到了現在個方浜路，我寫下搿段文字留作考證。
朱元璋建立明朝之後，屢詔江南名紳秦裕伯出仕，秦氏也是北宋名臣秦觀個8世孫，秦裕伯只好赴南京任職。洪武六年（1373年）秦裕伯去世，朱元璋親自敕封秦裕伯為上海縣城隍，上海就有了第二個城隍神，俗稱「前殿為霍，後殿為秦」、「一廟供二神」。中國絕大多數城隍廟僅僅設立一位城隍老爺，而上海個城隍廟卻是有得兩位城隍老爺。
早在清道光二十二年（1842），江南提督陳化成駐守吳淞炮臺抗擊英軍，最後壯烈犧牲，上海人勒老城廂個縣衙旁邊建立陳公祠紀念伊。1937年抗日戰爭爆發，日本侵略軍拿陳公祠毀壞了，陳化成個塑像撥厾到了街頭。上海人就拿陳化成個塑像抬到了城隍廟裡，供奉勒大殿個後進，稱伊為上海城隍神。迭能，上海城隍廟就有了第三個城隍神，一廟三城隍，勒全中國是絕無僅有個。
上海城隍神還叫「護海公」，搿個又是哪能樁事體呢？
情況是迭能介個，清朝同治皇帝命令江南八府勒7日天當中送糧進京，到了第6日，同治皇帝接到奏報，江南連續幾日天大霧，運糧個船嘸沒辦法行駛，難以按時送達。到第7日早浪，同治皇帝上朝，驚喜個聽講糧船已經到京城。原來，大霧瀰漫，糧船無法前行，突然勒茫茫大霧當中亮出了三盞大燈籠，照亮河面，於是糧船全速前進。三盞燈籠浪各有一個大字「秦」、「裕」、「伯」，秦裕伯是上海縣城隍神。
同治皇帝繼續追問，得知船隊途經上海個辰光，為了求得城隍神護佑，負責押運個官員到上海城隍廟去進香，乃末上海城隍神顯靈，保佑糧船準時到達北京。同治帝邪氣開心，下旨加封上海縣城隍神秦裕伯為「護海公」。
從此以後，船隻進出黃浦江，船主或者押船個官員板定到上海城隍廟去燒香，祈求「護海公」保佑。人們勿僅到上海城隍廟來燒香，還樂於捐贈財物，使得城隍廟個香火興盛不絕。
作者：柯兆銀
講述：馮蓉
丁迪蒙，啟迪矇昧者也。上海市人。原上海大學中文系教師，多年來一直致力於滬語和海派文化的傳承。
滬語是吳方言的代表方言，是吳儂軟語的典範。她既可以用來拉家常，也同樣可以用來朗讀各類詩歌散文。
滬語完全可以書寫，同粵語可以寫作是一樣的。本平臺所有文章都是經過改寫後，用滬語來演繹的，漢字書寫也是正確的。
丁迪蒙所撰寫的，與滬語相關的著作主要有：
《學說上海話》上海科技文獻出版社
《聽聽說說上海話》少年出版社
《實用滬語》復旦大學出版社
《上海話繞口令》少兒出版社
《上海方言詞語使用手冊》上海教育出版社
《上海話讀成語故事》少兒出版社
《囡囡學童謠》，少兒出版社。
轉自：「啟迪心田滬語」公眾號
我知道你喲~